باچرموسم تعالو
تعالو أخوتي أنطوش التمرات
من أنخلص نلعب غميضة جيجو
نترك لعب الحيلّة
كسر عصية ولعب چعاب للبنات
لعبتنه طم خريزة ، شطيطو و خريساني
نرجع نتحمه للشاخة بطفرات
بديره العبنه أجمل لعبات
تبها ازغيره و سبع حجارات
بطفولتنه ما فاتتنه
العبنه كل العبات
باچر موسم تعالي يا بنت الديره أنطوش التمرات
ما چنه أنزوقل چانت تتردد بناتنه حلوه الچلمات
هذا يغني هذا يمزح
نركض ونتبادل أحلى الضحكات
البنبر چان امدلي واحدنا يحوي و يأكل بهل الثمرات
ترعرعنه بحبنه الطيب تحت فيّ و ظل السدرات
بالنهران انغوص و ننبگ
نشرب من عذب الميات
ما چان رفیش یخوفنه لأکوسی لأ أبوزمیر و دود الفريال
صغار و عاندنه حتى السورات
باچر موسم تعالو تعالو أخوتي أنطوش التمرات
بيوتنه مفتوحة للكل و الكل چانت تأكل نفس الخبزات
نحفر حفره نلعب بيه گلول و لوز
نترك
نصعد عش البلبول
أنكسر سعف النخلات
صارت عدنه سگله و لاگ
حمييد يحب لعبة ام حچيّم
تعال و شوف تعله بينه الصرخات
باچر موسم تعالي يا بنت الأحواز أنطوش التمرات
البجامه من تشگگ من اركبه چانت تتخیط لبسات
حفاي و نجري أنلف التمره بالخبزه نترك مفتوحة الدبات
تصرخ امنه ولكم سدو الدبه
نشفتو علينه التمرات
نرجع علبيت المغرب جدتنه سولف النه حزورات
باچر موسم تعالو أخوتي أنطوش التمرات
اجه شعبان و دگ الباب
گرگشون گرگشون الله يخلي الزغيرون
اهل السطوح تعطونه لو أنروح
كل واحد چيسه بيده
ام خيرية بچان الباصورگ
أعطت لفطيمه ترچیات
صار الصايح بين فطيمه و ام خيرية
جت حريشه ..... حلوه عيونچ
تگله شمحله عليچ الترچیات
بنتی الباصورگ يكسرضرسچ
سمعي لمچ لحچایات
باچر موسم تعالي يا بنت الديره أنطوش التمرات
تمتد السفره برمضان
ماغوطه تشريبه كبه و جدر الگمات
هذا رايح هذا جاي
محبس تعتومه شمحلاها ذيچ الگعدات
من هل هلال العيد
المختاض يصالح خيه بشبگات
يحضنه چنه أسنين الما شايف خيه
و أتهلهل بينه الحلوات
باچر موسم تعالو أخوتی أنطوش التمرات
مكيه بعشرة عاشور تبصط بصطته
يارتنه العلويه تتنوع بعدة طبخات
المله الدجال الأكبر يعبي بكرشه بديچ العباس
و ينفخ بينه بكود الچذبات
تتغير بالموسم اكلتنه طرطير ، گاگله و رشاد البر
يحرگ بینه الشفات
بچله محروگ صبعه ، مصموطه ، تضخانة گباب المالح
مصيبه مصيبه نتحسر بطبيخ المحشي بطات
باچر موسم تعالي يا بنت الديره أنطوش التمرات
نتريگ بخبز و چای و نرجع انکمله برطبات
الفرس بسفرتهم اشکال الگیمر ، عسل ، حليب معقم ، صمون , زبد و جبنات
تركوا الفگر ينهش بينه سرقوا كل الخيرات
أهلنه واحد يحچي ويه الثاني طرگاعه طلعت بديرتنه النفطات
باچر موسم تعالو أخوتي انعبي الفشگات
غيمه سوده جت للديره وياها كثرت سيارات
چیسوا ناس كثيره كلهم بيض الدشداشات
أخذوا عيسى و دهراب و محيي لمو كل المجموعات
صرخت امي يا بن عمي چا وین التنبل ؟
وينه حزب اسعاده و ابن طليل ؟
يا أبوخويلد برض كنانه
أسمع لختك هل نخوات
باچر موسم تعالي يا بنت الديره أنعبي الفشگات
تعجبنه كل النسوان التمّن
زلمنه توگف النه بالشدات
زغار احنه ما حسينه شو تعني هل المأسات
الوفه كبر و كبرينه اويا
گمنه أنخطط و صارت عدنه الوصفات
جالي عضيدي ويه ارفيجي
گمنه نرسم بالخطات
گلنه بسنه من الذل نبقى مرفوعين الهامات
ما يرجع حگنه من الغاصب
الا بلوي الذانات
باچر موسم تعالو أخوتي انعبي الفشگات
ظهر بینه عرج الخایس
أبراهیم و کاظم طلعوا افات
ساواک و بذيچ الشرجیه
نزلت بينه الطعنات
مر علينه الدگ بشكاله
تلگونه هناک سباع منهم الشهيد البطل محمد عبودي
چعب ، تميم , سواري ، سواعد , بني طرف وعبيات
سئلونه واحد واحد شلون الخطه أنكشفت
گلنالهم الناس الي ما عنده الغيره
باعونه بالتومان و صرت خردات
خوتي خوتي الگاع عزيزه علينه
لا تتعجبو درب الثورة بي صعدات و بي نزلات
لو ما نتوحد و الله تأكلنه الريمازه
ياكلنه الهبري و الجدري و تعشعش بينه الگملات
باچرموسم تعالو أخوتي تعالي يا بنت الأحواز انعبي الفشگات
ليست هناك تعليقات:
إرسال تعليق